PAAP – Programi për Autonomi dhe Aftësim Profesional (12+)

Çfarë është PAAP?

Programi për Autonomi dhe Aftësim Profesional (PAAP) u dedikohet të rinjve dhe të rriturve me sindromë Down mbi moshën 12 vjeç. Qëllimi kryesor është zhvillimi i autonomisë personale dhe sociale, si dhe përgatitja për integrim në tregun e punës përmes aftësimit profesional.
Shërbimet ofrohen individualisht dhe në grup, duke respektuar nevojat dhe potencialin e secilit të ri.
Programi PAAP është i akredituar nga Ministria e Përkatëse, Departamenti për politikat e shërbimeve sociale dhe familjare, ndërsa stafi është i licencuar për ofrimin e shërbimeve psikosociale po nga ky institucion.

Shërbimet terapeutike / sociale

Procesi i vlerësimit në PAAP ndjek të njëjtin parim si tek PIEH: kontakti i parë, vlerësimi multidisiplinar, hartimi i Planit Individual të Aftësimit dhe rishikimi i rregullt i progresit.

Në kuadër të PAAP ofrohen shërbimet e psikologut, logopedit dhe ergoterapistit/terapistit okupacional si dhe të punonjësit/es social/e. Synimi është zhvillimi i mëtejshëm i aftësive njohëse, emocionale, sociale dhe të pavarësisë, në mënyrë që të rinjtë të jenë të përgatitur për jetë të pavarur dhe punësim.

Autonomia sociale dhe edukimi seksual

Autonomia personale nënkupton aftësinë për të kryer në mënyrë të pavarur veprimet e përditshme, si larja dhe higjiena personale, ushqyerja, veshja–zhveshja, orientimi hapësinor dhe kohor. Autonomia sociale përfshin aftësitë e komunikimit dhe sjelljes në komunitet, përdorimin e parave dhe shërbimeve publike, përdorimin e transportit dhe respektimin e rregullave dhe normave sociale.

Edukimi seksual synon informimin për shëndetin seksual dhe riprodhues, kuptimin e kufijve personalë, dashurisë, miqësisë dhe marrëdhënieve, si dhe mbrojtjen nga abuzimi dhe shfrytëzimi, përmes informacionit të qartë dhe të përshtatur me moshën.

Edukimi joformal, vetë–avokimi & aftësimi profesional

Klasat për edukim joformal dhe vetë–avokim mbështesin të rinjtë në arritjet akademike, art dhe sport, dhe i aftësojnë ata për të njohur dhe mbrojtur të drejtat e tyre, duke u bazuar në konceptin e qytetarisë aktive dhe vetë–avokimit.
Klasat për aftësim profesional dhe punësim ofrojnë përgatitje teorike dhe praktike për profesione konkrete dhe për përfshirje në tregun e punës. Programi përfshin praktikë në punëtori të DSK-së dhe partnerë të jashtëm.