Programi për Intervenim dhe Edukim të Hershëm (PIEH)
Çfarë është PIEH
Programi për Intervenim dhe Edukim të Hershëm (PIEH) ofron shërbime terapeutike dhe mbështetëse për fëmijët me sindromë Down nga mosha 0–12 vjeç. Programi fokusohet në fëmijërinë e hershme (0–6 vjeç) dhe fëmijërinë e mesme (6–12 vjeç), për të nxitur sa më herët zhvillimin motorik, njohës, gjuhësor, social dhe emocional.
Shërbimet ofrohen në format individual (një me një) dhe në grup, gjithmonë në bashkëpunim të ngushtë me familjen.
Pse është i nevojshëm programi PIEH?
Intervenimi i hershëm është një program sistematik terapish dhe aktivitetesh të dizajnuara për të adresuar vështirësitë në zhvillim sa më shpejt që të jetë e mundur. Për fëmijët me sindromë Down, mbështetja e hershme ndihmon në zhvillimin e aftësive bazike motorike, njohëse dhe të komunikimit, redukton rreziqet për vonesa të mëtejshme, përgatit fëmijën për përfshirje në çerdhe, kopshte dhe shkolla dhe fuqizon prindërit për të qenë pjesë aktive e procesit terapeutik.
Programi PIEH është i akredituar nga Ministria e Drejtësisë, Departamenti për politikat e shërbimeve sociale dhe familjare, ndërsa stafi terapeutik dhe profesional është i licencuar për ofrimin e shërbimeve terapeutike.
Shërbimet në kuadër të PIEH
- Identifikimi dhe vlerësimi i hershëm
- Informimi për kujdesin shëndetësor
- Terapia fizike
- Terapia e zhvillimit dhe okupacionale
- Terapia e gjuhës, të folurit dhe komunikimit
- Terapia e sjelljes
- Shërbimet psikologjike
- Shërbimet pediatrike
- Mbështetja profesionale dhe psiko–edukimi për prindër
- Ndërmjetësimi për gjithëpërfshirjen në institucionet edukativo–arsimore
- Trajnime për prindër, edukatorë, mësues, profesionistë dhe studentë të fushave sociale
Vlerësimi nga ekipi multidisiplinar
- Kontakti i parë – prindi / familja kontakton DSK-në për informata dhe mund të caktoj takimin e parë.
- Mbledhja e të dhënave bazike – plotësohen formularët, mblidhen raporte mjekësore dhe informata nga prindërit.
- Vlerësimi multidisiplinar – fëmija vlerësohet nga ekipi (psikolog, logoped, fizioterapist, terapist okupacional/pediatër, sipas nevojës).
- Plani Individual i Edukimit (PIE) – ekipi, në bashkëpunim me prindërit, harton planin me objektiva të qarta zhvillimore.
- Rishikimi periodik – progresi vlerësohet dy herë brenda vitit dhe plani adaptohet sipas nevojave.
Terapia fizike
Qëllimi i terapisë fizike është lehtësimi i zhvillimit motorik dhe parandalimi ose minimizimi i lëvizjeve zëvendësuese gjatë qëndrimit dhe lëvizjes. Terapia fokusohet në zhvillimin e aftësive motorike bazike (shtrirja, rrotullimi, ulja, zvarritja, qëndrimi, ecja, vrapimi), koordinimin e lëvizjeve, zhvillimin e ekuilibrit dhe tonusit muskulor.
Terapia e zhvillimit dhe okupacionale
Kjo terapi synon integrimin e aftësive konceptuale, motorike, gjuhësore, socio–emocionale dhe vetë–ndihmëse. Fokusi kryesor është në motorikën globale dhe fine, përqendrimin dhe kujtesën, aftësitë njohëse dhe konceptet bazike, koordinimin hapësinor dhe kohor, perceptimin vizual dhe auditiv, aftësitë imituese etj.
Terapia e gjuhës, të folurit dhe komunikimit
Në këtë program punohen zhvillimi i gjuhës së folur, të kuptuarit e gjuhës, komunikimi verbal dhe joverbal, si dhe përdorimi i mjeteve mbështetëse të komunikimit, sipas nevojës. Qëllimi është që fëmija të mund të kuptohet dhe të përgjigjet ndaj ambientit përreth, duke ndërtuar marrëdhënie të sigurta me familjen dhe bashkëmoshatarët.
Terapia e sjelljes
Terapia e sjelljes fokusohet në menaxhimin e sjelljeve sfiduese, zhvillimin e aftësive sociale dhe të rregullimit emocional, si dhe krijimin e rutinave pozitive në shtëpi dhe në institucionet arsimore. Në bashkëpunim me prindërit, hartohen strategji praktike që mund të zbatohen në përditshmëri.
Shërbimi psikologjik dhe pediatrik
Shërbimi psikologjik përfshin vlerësime psikologjike dhe zhvillimore, trajtim dhe këshillim psikologjik për fëmijët, si dhe mbështetje emocionale dhe psiko–edukim për prindërit. Shërbimet pediatrike ofrojnë vlerësim shëndetësor dhe udhëzime për kujdesin mjekësor në bashkëpunim me profesionistët tjerë.
Mbështetja prindërore & për prindërit e rinj
DSK organizon takime informuese për prindër të rinj, sesione psiko–edukimi për të kuptuar zhvillimin e fëmijës, të drejtat dhe shërbimet, si dhe grupe mbështetëse ku prindërit ndajnë përvoja dhe marrin përgjigje profesionale.
Prindërit mund të kontaktojnë DSK-në për informata rreth procedurës së pranimit në program, listën e dokumenteve të nevojshme, orarin e shërbimeve dhe mundësitë për përfshirje në aktivitete prindërore.